06-24_Joan Bateatzailea

HOMILIA

     Udako eta Neguko Solstizioak (Ekinokzioak baino gehiago) parrandarako eta gehiegikerietarako egunak ziran antxinatik. Eleizeak ahalegin handiak egin izan ditu gehiegikeriak baretzeko eta baztertzeko. Baina, ikusten dogunez, gaur egun lehengora garoaz inguruak: gehiegikerietara eta jainkozaletasuna baztertzera.

     Hortxe kokatu behar dogu Bateatzailearen irudia. Bere aldietan profetatzat hartua izan zanez, zelan iragarri izen handiko gizona zala? Holango egiak, ordukoek, kontakizun bidez azaltzen ebezan, eta ez definizino bidez.

     Jainkoagandiko gizona zala esan gura deusku, ba, haren izena Jainkoak agindua zala (Joan ezarriko deutsazu izena) dinoskunean, auzoko guztiak harriturik geldituazoz. Eta izen handiko gizona zala esan gura deusku guraso nagusi eta antzuengandik sortua zala esaterakoan.

     Hori baino gehiago ere agertzen jaku ebanjelio zati honetan: Joanek, bere tradizinoari uko eginez, basamortura egingo dauala ihes esan deusku.

     Basamortua Jainkoa bilatzeko lekua da, inguru kutxatu guztietatik urrun. Joanek, ba, berari egokion abade izateari (Zakarias bere aitaren tradizinoari jarraiki) itzi, eta, Israelen itxaropenari hauspo emotearren, basamortura, Jainko bila, egiten dau ihes.

     Herriko ohiturak, eta baita orduko erlijio agintari eta giroetan ere ez dau jainkozaletasunik aurkitzen, edo Jainkoaren agintzariak itxaroten ebanink ezagutzen. Eta han doa, Jainko egarriz, basamortura.

     Bizikera barri bat, beretua, hartuko dau; eta ozenki iragarten Jainkoak eskatzen ebana bihozbarritzea zala, ez itxurazko gurtza. Eta iragarpen hau zemaipean egiten eban.

     Nazareteko Jesusek ere entzungo deutso; eta haren berbek eta zemaiek esnatuazo egingo dabe. Eta Jesus ere, basamortutik igaro, eta erreinuaren barri emoten agertuko da. Baina ez zemaipean hartzen gaituan Jainkoa iragarriz, errukitsua eta maitalea dan Jainkoa baino. Aldea makala! Baina badirudi Joanek iragarten eban Jainkoa dogula nahiago…

     Bitartean, gure ingurua gero eta paganoagoa dala esan geike: ez ete leuke onartuko, zigorraz barik errukiaz eta maitasunez agertzen jakun Jainkoa, Jesusek iragarten deuskuna?

 

11 Urtean Zehar /A

 URTEAN ZEHARREKO XI. DOMEKEA /A

(Homilia)

 

Nahiko erratuta gagozala, uste dot, Legea, arauak eta betebeharrak Jainkoak zuzen-zuzenean emonak lez ulertzen badoguz, harek markatzen deuskun ubidetik urten barik ibili behar dogula-ta.

Israelgo herriak bizitz-esperientzia bat garatzen dau, eta bertako zuhurrek batzen dabez ohiturak eta zer jaken ongarri edo kaltegarri, eta hori guztihori zerrendatu eta lege eta arau lez, jarraibide jarten dabe, herri izateko eta herritarren hartu-emonak arautzeko balioko dabenak.

Eta horri indar emoteko, Jainkoaren aurrean jarten dabe, inguru liturgiko baten, otoi-giroan, eta herri osoak hartzen dau bizitz-arau lez, Jainkoak eurekaz batera jardungo dauala hitz emoten dauala bere aldetik.

Guk beste era batera ulertzen dogunez, ezin onartu geikez ebanjelioan Jesusek dinozkuzan gauza asko eta asko, ondo ulertuak daukaguzala uste dogun arren.

Legea eta ibilbidean nork lagundu daukan jentea dauka aurrean Jesusek. Eta, zelan ikusten dau? Deslai! Nora-ezean dabilz. Badaukez, ba, Tenplua, Ohikuneak, zuzendariak, legelariak… Baina hutsik dagoz!

Geuretu daigun hau. Eleizkizunak daukaguz, sakramentuak, eleiz alkartea, arauak… eta, barruan gagozala uste dogunok, ezin doguz erakarri seme-alabak, eta gitxiago lobak; ez gara ausartzen guzti honen barri emoten, bakotxak ahal dauan lez bizi izanik bere ustea edo sinisten dauana.

Ondo gabilz, ala deslai gabiltzala esango  leuskigu Jesusek?

Jesusek bizikera barri batera deitzen gaitu. Uste horretatik, siniskeria horretatik, urten beharra daukagu, hari jaramon gura badeutsagu egin.

Alde batetik, Jainkoaren ikuspegia hartu behar dogula dinosku: deslai dagozanakaz arduratu, eta hutsean hartu doguna eurekaz hutsean partekatu.

Hau ez da aukeratu batzuen eginbeharra; hau Jesusen jarraitzaile izan gura dogun guztion eginkizun  da: horrexetan agertzen dogu esker ona, aintzat hartzen dogula Jesus ezagutu izana, haren bideetan ibiltea, eta haxe eskeintzen deutsegula gure etxekoei.

Horrexetan laguntzen deusku eleiz-alkarte bat izateak, Jainkoagandiko hutsean hartutako dohaiak sakramentuetan gauzatuta ikusteak, bizitza bera ospatzeak, eta alkartzen garan bakotxean Jesus bera geure artean somatzeak.

Gure eginkizunak, ba, ez leuke izan behar Legea betez salbazinoa lortu gura izatea. Bestetara baino, Jesusen irakatsietan murgilduz geure barruan arakatu, hantxe aurkitu Jainkogandik hutsean hartutako dohaiak eta hareik geure inguruan deslai dagozanakaz partekatu, eurak ere euren barruan arakatu ahal izan daien adoretuz.

03/19 San Jose

03/19 San Jose

HITZALDIA

 

Zelango aldea dagoan ebanjelioari "estanpetatik" begiratzetik eta bere barruan buru-belarri sartuz hango esangureaz jabetzera. Handia, benetan. "Estanpetako" ikuspegietan Jose "heriotza on baterako" zaindaria izango dogu, oneraspen mailan geratuko da. Ebanjelioan buru-belarri sartzeak arazoak (ala argitasunak?) ekarriko dauz.

Badago arazo horreen artean Jesus senar bako emakumeagandik jaio dala esango dauanik, eta hau dala-eta bere inguruan "alboratua" izan dala, eta ihes egin behar izan dauala, eta Bateatzailearen inguruan "argitu jakola zerua".

Baina, Jesusen bizitzako lehen egun eta urteetaz gauza handirik jakingo ez badogu ere, hortxe jarten deuskue Mateok eta Lukasek Joseren irudia, Mariagaz ezkontzeko berbea emonda egoana, Jesusen aitatasuna bere gain hartuko dauana.

Mateok «gizon zintzo» lez aurkezten deusku, Jainkoaren esanetara dagoan gizon lez, haren nahia beteten ahalegintzen dan gizon lez, Jesusen aitatasuna bere gain hartzen dauan gizon lez, Jesusi Dabiden jatorria emongo deutson gizon lez: berak emongo deutso "izena" Mariaren semeari.

Zenbat ikasi geiken Joseren irudi honetatik! Ez gaitezan oneraspen hutsean gelditu, estanpetako irudiagaz. Sartu gaitezan buru-belarri ebanjelioetan, ulertzera heltzen ez garan gauzek kinkan jarriko bagaitue ere; eta, uste on osoa Jainkoagan jarrita, egin gaitezan bere entzule, bere nahiaren bilatzaile eta betetzaile, eta halango esker onez bizi izan gaitezan.